बोधकथा - वाघाचे कातडे पांघरलेला गाढव

Admin

१२ मे, २०२३

बोधकथा- वाघाचे कातडे पांघरलेला गाढव

देवपूर येथे विलास नावाचा धोबी राहात होता. त्याच्याजवळ एक गाढव होते. त्याला नीट खाऊ घालणे धोब्यास परवडत नव्हते तेवढी त्याची ऐपत नव्हती. त्याने युक्ती केली कुठून तरी वाघाचे कातडे मिळवले. रात्री तो ते कातडे गाढवाच्या अंगावर नीट बांधून देई, मग तो रात्री कोणाच्याही शेतात जाई, वाघ आला असे म्हणून सगळे पळून जात, मग ते गाढव मोकळ्या मनाने कोठेही फिरे आणि पोटभर चरत असे. असे खूप दिवस होऊन गेले. एक दिवस शेतकरी मचाणीवर बसला होता. त्याने या खोट्या वाघाला दुरून पाहिले होते. त्याने आपल्या गोफणीने एक मोठा दगड वाघाला मारला. तो दगड गाढवाच्या डोक्यावर बसला. गाढव मोठमोठ्याने ओरडू लागले, ते ओरडणे ऐकताच शेतकऱ्याने आपल्या मित्रांना बोलावून त्या गाढवाला बडवू लागला. नंतर त्या गाढवाला त्यांनी शेताबाहेर हाकलून दिले, आणि हसत हसतच ते तिघे म्हणाले, 'आपण उगीचच वाघ समजून गाढवाला घाबरत होतो'.

तात्पर्य : उसने अवसान जास्त वेळ राहात नाही. सत्य स्थिती केव्हाही बाहेर येते.

बोधकथा- वाघाचे कातडे पांघरलेला गाढव Audio story